نائبی جنابلاریندان نئچه سئوال

اوستاد نائبی جنابلاریندان بیر سئوال واریم دی. اؤنجه خواهش ائلیرم تورک دیلینده غلط یازسام منی باغیشلاسینلار.
آی منی تورک دیلی و دنیاسینان تانیش ائدن اولو اوستاد! بیرینجی سئوالیم بو دور که سیز همین من یازدیغیمی یازسئیدیز نجور یازاردیز کی کامیل تورکی اولا. ایکینجی سئوالیم بو دور کی: ائشیتدیم سیز قوتادغوبیلیغ دیوانین ایلک دفعه آذربایجانجایا چاغداشلادیبسیز. بو دیوان من بیلن اویغور دیلینده دی. آیا اویغور دیلی بیرجور تورک دیلی دیر؟ نه شباهتی یا فرقی وار؟ سیز بو دیلی هاردان و کیمدن اؤرگشیبسیز؟

محمدصادق نائبی: دوکتور انصاری جنابلاری! ان درین سئوگی ایله سیزین بو گؤزل تورکجه یازماغینیزی آلقیشلاییب سیزه باش ساغلیغی دیله ییرم. سیزین یازدیغینیز یاخشی دی، ایسته سز ان گؤزل تام تورکجه یازیلا، بئله یازمالیسینیز: "نائبی جنابلاریندان بیر سورغو واریم دی. اؤنجه ایسته ییرم (دیله ییرم) تورکجه یالنیش یازارسامدا منی باغیشلاسینلار. آی منی تورک دیلی و دونیاسی ایله تانیش ائدن کیمسه! بیرینجی سورغوم بو دور کی سیز ایندیکی یازدیغیمی یازسایدینیز نئجه یازاردینیز کی تام (بوتون) تورکجه اولا. ایکینجی سورغوم بو دور کی: ائشیتدیم سیز قوتادغوبیلیغ دیوانین ایلک کره آذربایجانجایا چاغداشلاتمیشسینیز. بو دیوان من بیلن اویغور دیلینده دی. اویغور دیلی بیرجور تورکجه دیرمی؟ نه اوخشاری نه اوخشامازی وار؟ سیز بو دیلی هارادان و کیمدن اؤگرنمیشسیز؟"
سونراکی سورغونوزا دئمه لییم قوتادغوبیلیک قاراخانلیلار تورکجه سینده دیر و اویغور یازیسی ایله یازیلمیش. قاراخانلی تورکجه سی، تورک دیلینین بیر دئییش (گویش)لریندن بیری دیر. نئجه کی آذربایجانجا ، بولغارجا، قیرقیزجا، قازاخجا، استانبولجا و ... دئییشلریمیز تورک دیلینده وار دیر. بونلار تورک دیلینین دوزه دیلیش قایدالاریندا اولماغا گؤره تورک دیلی ساییلیر آمما بیر بیری ایله فرقلری اولماق ایچین دئییش دئییلیرلر. اؤرنش ایچین:
آذربایجانجا: کیتابا یازدیم     ، قاراخانلیجا: کیتابقا یازدیمن
آذربایجانجا: کیتابی یازدیم   ، قاراخانلیجا: کیتابنی یازدیمن
من بو یازی نی آلتی آی صبح نامازیندان گون چیخانا قده ر پروفسور دوزگون دن اؤگرندیم.