نه لطفی وار بو چیلّه نین؟ یاوان گَله، قار اولمیا
الینده ال تاپیلمیا، ائوینده کی, یار اولمیا!؟
محبتین آشا داشا، اوره گینده قوشا قوشا
عشقین اولا یوز تاماشا، بیر دنه دیلدار اولمیا؟
بیر عدّه سور و سات آچا، بیر عدّه سی قاچا قاچا
اودا اولا قارا چیلّه، سوفره سینده نار اولمیا
آغیز دولو سؤزون اولا، یوز باخیشا گؤزون اولا
نه فایداسی اوزون اولا؟ بیر گئجه یار، وار اولمیا؟
اوخوماغا سسین اولا، مئی جامیوا دولا دولا
یار گلمییه سنله یولا، میضرابیوا تار اولمیا؟
باشیندا تاجِ کِی اولا، عؤمور کئچه، گون طِی اولا
نه فایداسی هر شئ اولا، بختین یاتا یار اولمیا؟
نه ارزشی سور و ساتین؟ نه ثمری مین باراتین؟
نه لطفی وار بو حیاتین؟ دوزلوگه ایلقار اولمیا؟
دیلدن دیله دوشدی سؤزوم، شاهد اولور اؤزگه اؤزوم
اومودوم وار بیر آللاها، اؤزوم ـ سؤزوم خار اولمیا
