مییانا سسی سیته سینده گئدن یازیلار؛ شهریمیزله ایلگیلی چئشیدلی قونولارا توخونولور.یازیلار عومومیتله خبر، سیاسی تحلیل، میللت وکیل‌لری نین برنامه‌لری ، دانیشیقلاری، و حیاتا کئچیردیک‌لری ایشلرو یانی سیرا دؤولتی قوروملار - او جومله‌دن فرمانداری و شهرداری‌نین- برنامه لری، خبر‌لری و اونلارین یؤنه‌تیجی‌لرینه یؤنه‌لیک الشدیری‌لری اوسته‌له‌ییر.بو اوزدن گله‌جک گونلرده مییانا سسی سیته‌سی‌نین یؤنه‌تیجی‌لیک(مدیریت) سئچیملرینه قاتیلاجاق آدایلارا، بیرده بو سئچیمده رای وئرنله‌ره یالنیزبیر اؤنری و الشدیریم(انتقاد) وار ایدی.
مییانا آذربایجان سینیرلاریندا یئرله‌‌شن؛ جمعیت ،مساحت و نئچه یوِزپارچا کندی ایله اونون بؤیوک شهرلریندن ساییلیر.آذربایجان آدی گلدیکده بئیینله‌ره چاتان ایلک مفهوم؛ اوردا یاشایانلارین دیلی و کیملیگی‌دیر منجه.بو سیته ده چالیشانلارین تاسسوفله اؤنم وئرمه‌دیکلری بیرنجی مسئله، یازیلاریندا ایشلتدیک‌لری دیل مسئله سیدیر.یازیلارین یوزده 98-ی فارس دیلینده قلمه آلینیر. بو سیته ده یالنیز بیر نئچه نفر اؤز دیلیمیزده یازی یازما باجاریغینا باشاری قازانا بیلمیشلر.بو سیته‌نین تکجه تورکجه یازاری مهندس نایبی‌ٰ دیر.باشقالاری بلکه یوزده بیر بو ایشی گؤرموشلر.نایبی جینابلاری نین یازیلاری دا یوزده 75-ی گینه فارسجادا یازیلیر.بیراز آچیق دئسم یاخلاشیق (تقریبا)، سیته‌ده چالیشانلارین هامیسی تورکجه یازماقدان چکینیر، بو نقیصه‌نی گئده‌رمه‌یه(برطرف کردن) آددیم آتمیر و آجی بیر حقیقت کیمی بوتونویله اؤز آنا دیلیمیزده ساوادسیز، عاجیز و دیل کیملییی آچیسیندان سورونلودورلار.
نظرده آلین : ایکی مییانالی‌نین بیر-بیرلری ایله فارسجا دانیشمالاری نه قدر گولونج‌دیرسه همن مییانالی‌‌لارین بیر-بیرلرینه یازدیقلاری کامئنت‌لر و فیکیر پایلاشیملاری دا گولونج اولور.فارسجا یازی یازمانین هئچ ایرادی یوخدور آنجاق تورکجه‌نی عجزدن یازا بیلمه‌ینله‌رین بیرنجی وظیفه‌ری بو دیلده یازی یازماغا؛ آزدا اولموشسا تسللوط تاپمالاریدیر.ایکی-اوچ سطیرلیک یازیلار دا، تاسف اولسون کی گینه فارسجا یازیلیر.کئچن گونلرده شهردارین برنامه‌لرینی و اویغولادیقلاری ایشله‌ری الشدیرن شهرداشلاریمیز، ایشین لاپ او دیب بوجاقلارینا چاتدیلار آنجاق یالنیز بیر سطیر تورکجه یازماغا چالیشمادیلار.یئری گلمیشکن خاطیرلادیم کی دیل یالنیز ایرتیباط وسیله سی کیمی دوشونولمه‌مه لیدیر؛ بلکه دیل هر اینسانین کیملیک، کیشیلیک(شخصیت)، اؤزگوونلیک (اعتماد به نفس) و بیر چوخ مسئله‌لر او جومله‌دن یاشادیغی توپلوم‌دا یییه‌لنه بیله‌جک حقوقونون تملی ساییلیر.دیلینی و اونو منیمسه‌مه‌ین هر بیر شهرداشیمیز بوتؤولوکده ایران بویدا مملکتده اؤز فانونی حاقلارینا صاحیب اولا بیله‌جه‌یینی گؤزله مه‌مه‌لی و کیچیک میقیاسلاردا او جومله‌دن اؤز شهریمیزه ایستئعداد و لیاقتی اولدوغو قدرحاق ایسته‌مه‌مه‌لیدیرلر.منیم بو قونودا یالنیز بیر سوالیم اولا بیلر: شهرینین گؤزه‌للیی هابئله گلیشمه‌سینه (پیشرفت) جهد گؤسته‌ریب، قایغی چکنلر نئجه اولور اؤز اینسانی وارلیقلارینین گؤزه للییی‌نه و تملینه(اساس) فیکیر وئرمیرلر.؟؟؟
اومودوم وار هئچ بیر تعصب و ساپدیریجی(انحرافی) بحث‌لره قاچمادان، بهانه گتیر‌مه‌دن ؛ گله‌جک گونلرده بو بؤیوک عیب، ایراد و عجزی آرادان قادیرماغا چالیشاق.بو مسئله سیته‌ده چالیشانلارین یوزده 99-نا شامیل اولور.
بو یولدا بیزه یاردیم ائده‌ن تورکلوک بیلینجی، ایراده و کیملییمیزه (هویت) سوروملو( با مسئولیت) داورانماق اولاجاقدیر.
سونسوز حؤرمتله
1390.3.4
