سلاملار عزیز یولداشلاریم. مییانا سسی سیته سینده ایلک یازیمی بیر ناغیلدیر، آغیر!
بیری واریدی بیری یوخودو!
بیر گون دونیانین بیر گوشه سینده بیر کند واریدی کی دؤرد دؤوره کندلره گؤره چوخ گؤرکملی و امکاناتی یئرلردن ساییلیردی. مردومو سایغیلی، آشیقلاری وارلی و صنعتکاری ساییلی ایدیر.
زامانلار کئچدی و بو مردم یالنیز اؤزلرینه فیکیر ائتدیلر. وارلیلار گون به گون وارلیلاندی و کاسیبلار گون به گون کاسیبلاشدی. بنالار اوجالدی و البیسه لر گؤزللشدی. آمما سؤز اوردا دیر کی آشاغی محله لر باتدیغجا باتیردیلار. چون کو نئچه جرگه واریدی کی ال بیر اولموشدو و قارینلارین دولدوردوغجا، حریصلشیردیلر. یوخاری محله اوشاغی ایله آشاغی محله اوشاغینین دیلی و لهجه سیده دئییشیردی و دونیالار فاصیله آچیردی.
بنالار و ائولرین ایچی گؤزللشیردیر ولی کند ائله همن گئچمیش کندیدیر. دؤرد دؤوره کندلر آبادلاندی آمما بو کند گئت به گئت باتیردی. کدخدا، دوقتور، آل وئرچی و مردوم مدرنلشدیکجه شهر اسکیلیردی. بیری آت مینیردی بیری آجیندان آددیملایا بیلمیردی هله گؤزه لی، بو سؤزلری دانیشانلاردا ازیلیردی.
اومید هامیدان اوزولوب. کنده گلن بیر باخیردی گؤروردو کی کند همن کند، آمما مردوم یوخ... کؤچن کؤچدو قالان یاندی. ایشسیزلیق، هنرسیزلیک، آجلیق. آمما کندین او باشی، ائله بیل بو کنددن دئییل دیر. آیری ایش، آیری دیل، آیری آرزی، آیری یاشام و آیری دونیا.
کنده فیکیرله شن یوخودو، او باشدا جیبلرین دولدورماغا و بو باشدا قارنین دویدورماغا مشغولدولار.
آمما
ائله بیل مردوم جاهیلیدی. آمما دئییردیلر چوخ بیلیرییک و داها بیلمک ایسته میریک.
ائله بیل مردوم وارلییدی. آمما دئییردیلر یوخسولوق.
ائله بیل مردوم یوخسولودور. آمما دئییردیلر توخوق اوتانجدان.
ائله بیل کند وئرانیدیر و دوغرودان وئرانیدیر
