داغ
اوستونلوك و اوجاليق سيمگه سي اولسادا
داغچيیا ، داغ
ياشاييش آنلامي دير
بو آنلامي ياشامادا قار ، كولك ، سويوق ، سازاق ، دولو ، ياغيش و باشقا چتينليكلر قارشيسيندا داينمالي دير
داغچي : ايلهامين طبيعت دن آلير و اوز حاياتيندان اونا پاي وئرير
بير قيرميزي آلماني يولداشلارينين آراسيندا بولمك ايسته يير ، نئجه كي هر بير ديليم آلماني بير پاي حاياتيندان سانير .
داغچي توكنمز يوللارين گوجلو يولچوسو اولسادا ، ان گوجسوز يولداشينين آرخاسيندا بير داغدير ، زيروه ني يولداشسيز بيه نمه يير ، بونا گوره اوره گينين چيرپينماقين يولداشينين اياقلارين ريتميله قورور ( تنظيم ائله يير )
داغچي يولداشلاريلا ياريشمايير ، هيچ بير كيمسه يله ياريشمايير و كيمسه ده ن آلقيش اوممايير .
سحرين دان اولدوز ، شئحلي بنوشه نين دانسويو ، گوزل قوشلارين نغمه سي ، گونشين حايات باغيشلايان ايستي سي و باياض گئجه لرين آي ايشيقي اونا تانري طرفيندن ويريلن بير پاي اولدوقجا يوكسك بير آلقيشدير .
داغچي طبيعته وورغوندور ، طبيعته عاشيقدير و بو عشق اونا حايات باغيشلايير و او بو حاياتي يولداشلاريلا پايلاشير
داغچي طبيعته ، داغا اينانيب ، اينانيب كي آلاهين گوجونو اوز به اوز گورمه ليدير ، و واسيطه سيز اونا ديز چوكمه لي
داغچي بير ايلده دورد ييل ياشايير ، دورد ياز ، دورد ياي ، دورد گوز و دورد قيش
هر بير يوكسلمه ده ( صعود) يازي داغين يام ياشيل ياماجيندا و قيشي داغين قارلي زيروه سينده گورور
داغچي دفعه لرله بوتون اينسانلاردان ان اوجا يرده اولسادا بوتون اينسانلارين قارشيسيندا باش ايير و اينسانيت قوللوقچوسودور
داغچي اوجا داغلارين زيروه سينده اوزاقلارا باخير ! و گلديگي يولو ايزله يير و گله جه گيني دوشونور
داغچي يورولور ، اينجي يير ، اوسانير ، سينسي يير اما دوزور ، دوزومه دوزمك اويره دير !
داغچي آماجي زيروه دير ، باشي اوجا ، غرورلو ، باريشماز زيروه اونو ياريشا چاغيرير ، داغچي يوكسه لير ، بويويور ، اوجالير ، غرورسيز باشي اوجا ياشايير و باشقا بير زيروه ني دوشونور
داغچي اوزگور ياشايير و بوتون اينسانلارا اوزگورلوك آرزولايير
