سحرچاغی ائوده یاتاراق،قاپینین چالماغیلا یوخودان اویانیرام.قاپینی آچارکن کوچه میزده بیر کیتابین یاییلماسینی گؤرورم.منجه ایلک دفعه اولاراق،کوچه میزده بئله کیتاب یاییلیر.آنجاق کیتابین نه قونودا اولماغی منی تلسیکله اوخوماغا ماراغلاندیریر.
بلی.پارلمان سئچگی سینه آز زامان قالاراق،یئنی دن رئکلام لار باشلانیر.کیتابین باشلیغی،سایین نماینده لریمیزین بیرینین رئکلامین بللی ائدیر.کیتاب چئشیدلی بؤلوم لردن اولوشوب دیر.یول بؤلومو، ساغلیم بؤلومو، کولتور بؤلومو، سو و هابئله چؤلچولوک بؤلومو و...
آنجاق بو کیتابین یازی لاری منیم دوشونجه لریم له دوز گلمه مه سی،منی بیرداها کیتابین اوخوماغینا مجبور ائدیر.
کیتابین بیر بؤلومونده (موزه تاریخ ومردم شناسی)دن سؤز گئدیب.اؤته یاندان مییانانین تام یئر آلتی لاری تئهران و تبریز موزه لرینده اولماغی گؤزومون اؤنونده دورور.
باشقا بؤلومده (احداث پل ایستگاه راه آهن میانه) دن سؤز آچیلیر.
هانسی کؤرپو؟ مییانالی لارین بؤیوک ماشین لار ایلا چای دان کئچمه سی و بیر دؤوور آچاچی کندینی فیریلدامالاری اوزون سوره دیر کی بیر سئریالا چئوریلمیشدی.ایرانین هانسی شهرینده بیر کؤرپونون دوزلدیلمه سی بیر بئله زامان آپاریر؟؟ داها ماراغلی نماینده میزین بو ایشی نئچه ایللر بویوندا باشا چاتدیرماغینا گوونمه گی دیر.
ان اؤنملی بؤلوم لردن بیری (دانشگاه پیام نور ترکمانچای) بؤلومو دیر.من اؤزوم دانشگاه پیام نور ترکمانچای!!!! اؤیرنجی سی اولدوغوم اوچون،اونیورسیته نین دورومونون آچیقلاماسین سایین شهرداشلاریما گرکلی بیلیرم.
(جهاد کشاورزی) اداره سینی دانشگاه آدلاندیران نماینده یا دانشگاهین اؤزللیک لرایله تانیش دئییل یوخسا کسین بیر کره ترکمانچای شهرینه گلمه ییب.نئجه کی بیلیرسینیز اونیورسیته یه بیر سیرا اؤزللیک لر تعریف ائدیلیب.ایلک اؤنجه اؤزل تیکینتی اولماق گرکلی دیر.ایکینجی اؤیرنجی لرین گئدیش گلیشینه بیر سیرا ایشلر گؤرمک و... کی بونلارین هئچ بیری گؤرولمه ییب.
ترکمانچای بیر داغلیق شهر اولدوغونا گؤره سیناق لار سوره سینده قار یولو باغلایاراق،اؤیرنجی لرین بیر چوخو سیناق لاردا ایشتیراک ائتمه لرینی الدن وئریرلر.
بو 300 صحیفه کیتابین هئچ بیر یئرینده نماینده نین سوروملولارا قومیت حقوق لارینین حاققیندا مکتوب گؤندرمه مه گی چوخ ماراغلی دیر.
کئشکی مین دن چوخ مکتوب یایماق یئرینه بیر آزجادا مییانایا گؤرولن ایشلر یاییلیدی.بو کیتاب رئکلام دان باشقایا هر زادا بنزه ییر.آنجاق یاییلماسینین آنلامی بللی دئییل.
اومورام سایین نماینده میز بیزلره (قلم نویسان مزدور) آدی وئرمدن،پارلمانین ایلک جلسه سینده آنا یاسادان مودافیعه ائتمه سینه آند ایچمه گینی گؤز اؤنونه آلیب،بو آز سوره ده بیر آزجا مییانایا و باشقا 3 شهریمیزه چالیشسین.
